Дар арафаи иди истиқлолият поликлиникаи оилавии рақами 13-уми деҳаи Бурҷимуллои ноҳияи Бӯстонлиқ баъди таъмири капиталӣ аз нав ба истифода супурда шуд.
Дар арафаи иди истиқлолият поликлиникаи оилавии рақами 13-уми деҳаи Бурҷимуллои ноҳияи Бӯстонлиқ баъди таъмири капиталӣ аз нав ба истифода супурда шуд. Ба қоидаҳои шароити пандемия риоя карда дар рӯзи кушодашавии он намоянда аз ҳокимият, иттиҳодияи тибби ноҳия, раисону фаъолони ҷамоати шаҳрвандии деҳаҳои ҳудуд ва ходимони ин маскан иштирок доштанд.
То солҳои 70-уми садаи гузашта шифохона дар ҳудуди Тагиахо ҷойгир буда шуъбаҳои амбулаторӣ, касалиҳои бачагона, тавлидгоҳ ва ғайра – ҳама бинои алоҳида доштанд. Ҳудуди шифохона васеъ, беморон зери дарахтони серсоя баҳузур сайр мекарданд. Бинобар сохта шудани НБО-и Чорбоғ дар қатори дигар иншоотҳо шифохона низ аз он ҳудуд ба бинои сеошёнаи меҳмонхонаи корхонаи кону маъдани ҳамонвақтаи Устарасой кӯчонда шудааст. Қариб ним аср аст, ки ин бино ба ҳифзи саломатии аҳолии деҳа ва деҳаҳои наздик хидмат мекунад.
Дар кишвар солҳои охир чун дигар соҳаҳо ба рушди соҳаи тандурустӣ эътибори ҷиддӣ медиҳанд. Махсусан баъди тасдиқи Фармони Президент «Доир ба консепсия ва барномаи рушди соҳаи ҳифзи тандурустӣ барои солҳои 2019-2025» баробари ба дараҷаи баланд баровардани ташкили корҳои ёрии таъҷилии тиббӣ ба беҳтар намудани хидматрасонии поликлиникаҳои оилавии деҳоту шаҳр эътибори алоҳида нигаронида шуд.
– Аз моҳи апрели соли 2019 ба азнавтаъмиркунии бино шурӯъ карданд ва баъди як солу се моҳ ба истифода супурданд. То ин дам мо ба пункти тиббии деҳаи Яккатут кӯчида, фаъолияти худро давом додем, – гуфт дар суҳбат сардухтури ин маскани шифо Мавлуда Мирзоҳакимова. – То таъмири бино хонаҳои ба меҳмонхона муқарраршуда баъзан ноқулайиҳоро ба вуҷуд меовард. Аснои реконструксия он дар асоси лоиҳаи муассисаи тиббии ба талаботи имрӯз ҷавобгӯ сохта шуд. Хонаву кабинетҳо васеъву равшан, бино бо шабакаи гармидиҳӣ ва оби гарму хунук таъмин, умуман поликлиника қиёфаи нав гирифт. Барои аз нав бунёд шудани он 2 миллиарду 700 миллион сӯм маблағ сарф гардид.
Дар толори бино пештахтаи хидматрасонӣ ба мизоҷон ҷойгир аст. Аз ҷониби ходимони тиббии махсус, ки ин ҷо хидмат мерасонанд, ба қоидаҳои пандемия риоя намуда, мизоҷонро бо чеҳраи кушод ба шуъбаҳои зарурӣ роҳбаладӣ менамуданд.
Рӯ ба рӯи пештахтаи хидматрасонӣ дорухонаи иҷтимоӣ воқеъ гардидааст. Шуъбаи ёрии таъҷилии тиббӣ на танҳо бо намуди нав, балки бо алоҳидагии хонаҳои танзимгар, ёрии таъҷилии тиббӣ ва дигар хонаҳои хидматрасонии ходимон боиси қайд мебошад. Дар ошёнаи дуюм бо ҳамшираи калони поликлиника Насиба Нуртоева суҳбат оростем.
– Маскани мо имкони қабули 100 нафарро доро мебошад. Он ба хидматрасонии қариб 8 ҳазор аҳолии ҳудуд пешбинӣ шудааст. 33 нафар ходими ин маскан дар хидмати аҳолӣ камарбастаанд, – мегӯяд ӯ.
Беморон дар ошёнаи сеюм муолиҷаи зарурии худро мегиранд. Ин ҷо муолиҷаи ҳам статсионарӣ ва ҳам амбулаторӣ ба роҳ монда шудааст. Ҳамшираи шафқат Сайёра Холтоева бо муолиҷаи бемор машғул аст. 25 сол аст, ки ӯ аз рӯи ин касб меҳнат мекунад. Ӯ доир ба қулаиҳои баъди таъмир, – палатаҳои кушоду равшан, алоҳидагии ошхонаи беморон, ҷиҳозҳои нав, мавҷуд будани толор барои фароғати беморон, бо курсиҳои нарм ва телевизор таъмин будани он бо ифтихор ҳарф мезанад.
Ногуфта намонад, телевизори навро ба муносибати аз нав кушодашавии поликлиника аз номи аҳолӣ раиси ҷамоати шаҳрвандони деҳаи Янгиқӯрғон Иззатулло Мӯъминов супурдааст.
Барои шинос шудан бо ҳолати палатаҳои беморон ба яке аз онҳо ворид шудем. Он ҷо бемор Ҷамила Сотилова муолиҷа мегирифт. Ӯ кати нарм, столу стул ва ҷевонҳои замонавӣ, анҷоми шустушӯӣ дар ҳар хона, таъмини он бо оби гарму хунук, то барои хушсифат нигоҳ доштани маҳсулоти хӯрокворӣ, дар хонаи хӯрок гузошта шудани яхдонро бо хурсандӣ баён менамуд.
Аз сабаби риояи қоидаҳои пешгирии пандемияи коронавирус ба шуъбаи тавлид дохил шуданро ба худ раво надидем. Шояд чун дигар шуъбаҳо он ҳам дар асоси талаботи имрӯз бошад. Дари кабинетҳои ҷарроҳӣ, стоматология баста буданд. Зеро ку ҳамон мутахассисе, ки ин ҷо кор кунад?! Бо баробари муваффақиятҳо поликлиника аз камбудӣ холӣ нест. Зарур будани асбобҳои замонавии тиббӣ барои кабинетҳо, набудани мутахассисони ин соҳа натанҳо муаммои ин деҳа аст, балки онҳо дар ноҳия низ ангуштшуморанд. Ҳини суҳбат сардухтур аз набудани духтури занона (гинеколог), ки дар ҳудуд қариб 1 ҳазору 891 нафар занони даври тавлид дар қайд аст ва дар ин самт душвориҳо пеш меояд, арз намуд. Инчунин ба мутахассисони ҷарроҳ, педиатр, терапевт, стомотолог ниёз доштани поликлиникаро борҳо ба иттиҳодияи тиббиёти ноҳия арз кардаанд.
Шифокор М.Мирзоҳакимова соли 1973 факултети педиатрияи Донишкадаи тиббии Самарқандро хатм намуда, то имрӯз дар роҳи солимгардонии аҳолӣ адои вазифа дорад. Имрӯзҳо ӯ нафақат аз рӯи ихтисоси худ фаъолият мебарад, балки аз набудани мутахассисони зарурӣ, ҷоиз бошад, гуфтан мумкин аст, ки «шифокори универсал» ҳам мебошад. Махсусан дар шароити пандемия, ки барои боз ҳам ҳушёртар кор кардан даъват мекунад, ҷавобгарӣ ба ҳифзи саломатии аҳолӣ ва ходимони поликлиникаи мазкур дар ин синну сол ва фаъолияти қариб нимасра ба як шифокори фидоӣ хеле гаронӣ мекунад.
Дар моддаи 7-уми фармони Президент «Доир ба чораҳои дар ноҳияи Бӯстонлиқ аз тариқи ҷорӣ намудани тартиби махсуси беш аз пеш инкишоф додани сайёҳӣ» аз 27 августи соли 2020 рушди иҷтимоии инфрасохтори ноҳия ҳамчун самаранокии фаъолияти ҳокимият таъкид гашта, дар қатори таъмири муассисаҳои таълимӣ бо анҷомҳои зарурӣ таъмин кардани ташкилотҳои тиббӣ зикр шудааст.
Боварӣ дорем, дар паи иҷрои фармони мазкур поликлиника ҳам бо ҷиҳозҳои тиббиву кадрҳои зарурӣ таъмин мегардад.
Г.КАБИРОВА,
мухбири «Овози тоҷик».
Вилояти ТОШКАНД
