Ба Президенти Ҷумҳурии Ӯзбекистон Шавкат Мирзиёев дар бораи чорабиниҳои калони спортии дар пешистода ва нақшаҳои тараққиёти соҳаи спорт ахборот дода шуд.
Спорт дар мамлакати мо босуръат тараққӣ мекунад. Намудҳои он аз қабили футбол, волейбол, бокс, кураш, шоҳмот, теннис, вазнабардорӣ ва варзиши сабук хеле маъмуланд. “Олимпиадаи панҷ ташаббус” бо ғояи сарвари давлатамон ташкил шуда, ба тарғиби варзиш ва тарбияи ҷисмонӣ дар байни насли наврас мусоидат мекунад.
Дар рафти тақдимот пешниҳодҳо оид ба рушди варзиши оммавӣ, этноспорт ва гимнастика баррасӣ шуданд.
Аз ҷумла, пешниҳод мешавад, ки барномаи “Олимпиадаи панҷ ташаббус” аз 9 ба 12 намуди варзиш васеъ карда шуда, бори аввал дар байни маъюбон аз рӯи 5 намуди варзиш баргузор карда шавад. Мусобиқаи байналмилалии аспсаворон, ки ҳамасола дар арафаи ҷашни Наврӯз дар Сурхондарё баргузор мешавад, дар дигар манотиқи кишвар низ баргузор мешавад. Барои рушди иқтидори ҳунарҳои размӣ дар ҳама мактабҳои варзишӣ ифтитоҳи бахшҳои ҷанги тан ба тан ба нақша гирифта шудааст.
Чӣ хеле ки маълум аст, 25 майи соли 2022 қарори Президент “Дар бораи чораҳо оид ба оммавигардонӣ ва рушди намудҳои этноспорт” қабул гардид. Дар он, аз ҷумла, дар ҳар ду сол як маротиба дар шаҳри Хива баргузор намудани Фестивали байналмилалии этноспорт муайян шудааст.
Нахустин ҷашнвора рӯзҳои 7-10 сентябри соли ҷорӣ дар Ичанқалъа баргузор мешавад. Дар доираи он бозиҳои мардумӣ ва мусобиқаҳои варзишӣ, намоишгоҳи ҳунарҳои мардумӣ, ҷашнвораи харбуза, чемпионати палавпазӣ ва барномаҳои театрӣ баргузор мешаванд.
Сарвари давлат оид ба омодагии ҷиддӣ дидан ба ҷашнвора, пешбинӣ намудани тамоми қулайиҳо барои иштирокдорон ва сайёҳон, созмон додани Парки этнофестивали байналмилалӣ дар шаҳри Хева супоришот дод.
Тибқи қарори Президенти кишвар аз 23 декабри соли 2022 ҷиҳати рушди гимнастика корҳои зиёде анҷом дода мешаванд. Аз ҷумла, дар шаҳрҳои Нуқуқс, Самарқанд ва Фарғона марказҳои омодагии гимнастикӣ ташкил карда мешавад. Инҳо муассисаҳои таълимии махсуси варзишӣ мебошанд, ки хатмкунандагонашон аз рӯи ихтисоси тренер ва селексионер соҳиби диплом мегарданд. Ҳоло лоиҳаҳои сохтмон, таҷдид ва муҷаҳҳазсозии биноҳои марказҳо тартиб дода мешаванд. Ин муассисаҳои варзишӣ аз соли хониши 2024/2025 ба фаъолият шурӯъ мекунанд.
Сарвари давлат зарурати ҷорӣ намудани усулҳои пешрафтаи омодасозии варзишгарон дар ин марказҳо, ривоҷ додани парҳезшиносӣ, фароҳам овардани шароити мусоидро барои ба дарс расидани шогирдон таъкид намуд.
