Президент Шавкат Мирзиёев 16 март бо фаъолияти Маркази коркарди маълумотҳои Кумитаи давлатии андоз шинос шуд.

Ба мақсади фароҳам овардани қулайӣ ба аҳолӣ ва тиҷорат, кам кардани омили инсон дар соҳаи мақомоти андоз низ рақамигардонӣ пайваста амалӣ гардонда мешавад. Инак,  мувофиқи фармони Президенти Ҷумҳурии Ӯзбекистон аз 30 октябри соли 2020 маркази мазкур пурра модернизатсия карда шуда буд. Аз ҳисоби 100 миллиард сӯм маблағи бюҷети давлатӣ биноҳо таъмир карда шуда, бо таҷҳизоти доимии қувваи электр, кондитсионерҳои дақиқ, серверҳои пуриқтидор ва компютерҳо ҷиҳозонида шуданд.

Дар натиҷа иқтидори марказ 8 баробар афзуда, фарогирии хизматрасониҳои электронӣ васеъ гардид. Равандҳои мураккаб, ба монанди ҳисоб кардани хатҳои тавозун оид ба кортҳои шахсӣ 10 маротиба суръат гирифтанд. Масалан, агар пештар ҳисобу китоби нишондиҳандаҳои ҷумҳуриявӣ 24 соатро ташкил дода бошад, ҳоло ин раванд дар тӯли 2-3 соат сурат  мегирад. Баланд бардоштани суръати коркарди маълумот омили муҳими коҳиши иқтисодиёти сояафкан мегардад.

Технологияҳои муҳофизат аз ҳамлаҳои киберӣ, таҳлили тиҷорат татбиқ карда мешаванд. Маҳсулоти нави нармафзор, аз қабили «e-ijara», «e-imtiyoz», «Супорандагони андоз аз арзиши иловашуда», «Санҷишҳои андоз», «Низоми автоматикунонидашудаи назорати камералӣ», «Коэффисиенти фарқияти андоз» таҳия карда шуданд.

Ин марказро метавон “мағз”-и низоми андози ватанӣ номид. Он маълумоти ҳамаи андозсупорандагонро муттаҳид мекунад. Ҳудуди 50 нафар мутахассисони соҳибихтисос пайгирии гардиши андозро дар вақти воқеӣ таъмин намуда, ба таври фаврӣ хизматрасонии фосилавӣ пешкаш мекунанд.

Сарвари давлат бо кори марказ шинос шуд. Барои баланд бардоштани самаранокии фаъолияти мақомоти андоз супоришҳо дод.