Субҳ дамида буд. Чаҳор нафар дар таксӣ ба шаҳри Нурато равон будем.
Тақрибан 13-14 километр роҳро тай кардем. Дар муқобили роҳи мо сабукрави «Каптива» қарор дошт.
– Садама рух додааст, – гуфт ронанда ва суръатро сусттар кард. Ду нафар даст бардошта, ба истодан ишора намуданд. Мошини мо истод. Маълум буд, ки онҳо падару писаранд. Осеб надидаанд, вале писар меларзиду бо овози баланд гиря мекард. Марди тақрибан 45-50-сола хоҳиш кард, ки аз телефони мобилиамон истифода барад. Телефони мобилии онҳо кор намекард. Занг зад, вале ҳарфе гуфта натавонист. Ронандаи мо гӯшакро гирифта, бо хоҳиши ӯ аввал ба «Ёрии таъҷилӣ», сипас ба шуъбаи корҳои дохилӣ занг зад.
Афсӯс, ки дар садама модари ҷавон фавтидаву хоҳарбузургаш сахт осеб дида буд. Модарашро рӯйи роҳи мумфарш гузоштему хоҳарашро аз сабукрав гирифтем. Азбаски роҳ то беморхонаи маркази хоҷагии Нурато дур набуд, мошини «Ёрии таъҷилӣ» зуд расида омад. Зани ҷавонро дар он ҷойгир намудем.
– Хуни зиёд рафтааст, хун зарур, – гуфт духтур.
– Ман медиҳам, – гуфт Маҳбуба (мо бо хоҳиши ӯ номашро дигар кардем) ҷавонзане, ки ҳамроҳи мо буд.
Ҳама якҷо ба беморхона рафтем. Духтурон Маҳбубаро аз муоина гузарониданд. Ӯ хун супорид. Мо роҳи худро давом додем...
Некӣ куну ба об андоз, – гуфтаанд. Ғамхорӣ нисбати саломатӣ ва тақдири дигарон нишонаи волои меҳру оқибат аст. Донор шахси саховатмандест, ки ба бемори вазнин ва ногиро ҳаёти дубора мебахшад.
Тибқи маълумоти Маркази хунсупории вилояти Навоӣ дар ду моҳи аввали соли равон 2253 нафар донор ба беморон ёрии беғараз расонидаанд. Дар натиҷа 1154 литр захираи хун ба вуҷуд оварда шудааст.
Донорон ҳар гоҳ, ки ба Маркази хунсупорӣ омаданд, ҳатман дар бораи саломатии худ маълумот пайдо мекунанд. Миқдори гемоглобини хун, хавфи сар назадани бемориҳои сироятӣ муайян карда мешавад.
Дар ин ҷараён бештар Ҷамъияти саҳҳомии «Na-voiyazot» фаъол мебошад. Наздики 20 нафар коргарони он дар беҳшавии саломатии беморони вазнин саҳм гирифтаанд.
Ӯзбакбойи РАҲМОН,
хабарнигори
«Овози тоҷик».
Вилояти НАВОӢ.
