Дар доираи барномаи кории сафари давлатӣ Президенти Ҷумҳурии Ўзбекистон Шавкат Мирзиёев аз қароргоҳ ва маркази технологии ширкати пешбари чинии “BYD” дар Шэньчжэн дидан кард.
Ширкат пешвои ҷаҳонӣ дар истеҳсоли мошинҳои муосир, инноватсионӣ ва батареяҳои насли нав мебошад.
Муаррифии дастовардҳои ширкат, намоиши навъҳои тавлидшуда ва ояндадори техникаи автомобилсозӣ ва дигар, инчунин насли нави технологияҳо ва коркардҳои пешрафтаи ширкат баргузор гардид.
Сарвари давлат якҷоя бо президенти ширкат Ван Чуанфу дар маросими ифтитоҳи лоиҳаи васлкунии мошинҳои гибридӣ ва электрикӣ дар вилояти Ҷиззах бо иқтидори 50 ҳазор адад дар як сол ширкат кард.
Президент зарурати дар ояндаи наздик бо назардошти талаботи бозор васеъ намудани доираи моделҳо ва ба 300 ҳазор адад расонидани иқтидори истеҳсолиро дар як сол таъкид намуд.
Нақшаҳои ширкат оид ба роҳандозии васлкунии автобусҳои электрикии “BYD” дар кишварамон бо маҳаллисозии қисмҳои эҳтиётӣ ва созмон додани марказҳои муҳандисиву хидматгузорӣ низ дастгирӣ ёфтанд.
Дар рафти ташриф ба сарвари давлатамон мошини YANGWANG U8 ба нишони интиқоли 10 000-уми автомобили ширкат ба Ӯзбекистон ҳадя шуд.
