Президенти Ҷумҳурии Ӯзбекистон Шавкат Мирзиёев сафари давлатии худро ба Ҷумҳурии Мардумии Чин аз мулоқот бо Сарвазири Шӯрои давлатии Ҷумҳурии Мардумии Чин Ли Сян дар Хонаи ҷамъомадҳои халқӣ оғоз намуд.

Масъалаҳои густариши минбаъдаи ҳамкориҳои бисёрҷанбаи амалӣ, пеш аз ҳама дар соҳаи тиҷоратию иқтисодӣ баррасӣ шуданд.

Таъкид шуд, ки ба шарофати иродаи сиёсӣ ва талошҳои муштараки раҳбарони ду кишвар равобити Ӯзбекистону Чин дар ҳама соҳаҳо ва самтҳо ба сатҳи бесобиқа расидааст.

Соли гузашта гардиши мол 50 фоиз афзуда, ба 14 миллиард доллар расид. Имконияти ба 20 миллиард доллар расондани ин рақам, аз ҷумла аз ҳисоби зиёд кардани интиқоли молҳои хушсифати кишоварзӣ ва саноатӣ қайд карда шуд. Ҳаҷми умумии сармоягузории Чин ба иқтисоди Ӯзбекистон аз 14 миллиард доллар гузашт.

Масъалаҳои омодасозии барномаҳои алоҳидаи ҳамкорӣ дар самти навсозии инфрасохтор, тавсеаи кооператсияи саноатӣ, интиқоли технологияҳо дар соҳаи кишоварзӣ ва рушди энергетикаи “сабз” баррасӣ шуданд.

Инчунин, дурнамои амиқсозии ҳамкории амалӣ бо ниҳодҳои бонку молияи бонуфузи Чин, ҳамчунин иштироки ширкатҳои Чин дар раванди хусусигардонӣ дар кишвари мо баррасӣ шуданд.

Ба натиҷаҳои форуми якуми минтақаҳои Ӯзбекистону Чин ва намоишгоҳи саноатӣ, ки 22 январ дар шаҳри Урумчӣ баргузор шуд, баҳои баланд дода шуд.  

Дар ин рӯзҳо баргузории бомуваффақияти форуми таълимӣ ва Рӯзҳои фарҳанги Ӯзбекистон дар Чин қайд карда шуд. Ҷонибҳо ба минбаъд ҳам вусъат додани парвозҳои ҳавопаймоҳо ва мубодилаи сайёҳӣ пайравӣ карданд.

Дар хотима Президенти кишварамон Сарвазири Шӯрои давлатии Ҷумҳурии Мардумии Чинро барои боздид аз Ӯзбекистон даъват кард.