7 ноябри соли 2023 дар Осорхонаи давлатии таърихи Темуриён маросими имзои “Созишнома дар бораи ҷорӣ намудани маҳдудият дар воридоти маводи археологӣ ва этнологии Ӯзбекистон” байни ҳукуматҳои Ӯзбекистон ва ИМА баргузор шуд.
Созишномаи дуҷониба аз ҷониби директори Агентии мероси фарҳангӣ Баҳодир Абдикаримов ва Сафири Фавқулода ва Мухтори ИМА дар Ӯзбекистон Ҷонатан Ҳеник ба имзо расид.
«Ин созишнома барои рушди ҳамкориҳои байни Ҷумҳурии Ӯзбекистон ва ИМА дар самти пешгирии гардиши ғайриқонунӣ ва бозгардонидани ашёи осорхонавӣ ва фарҳангӣ ҳамчун асос хизмат мекунад», - гуфт директори Агентӣ дар суханронии худ.
Созишнома барои ба ИМА ворид намудани объектҳои дорои аҳамияти археологӣ ва этнологӣ, ки зери хавфи ғоратшавӣ қарор дошта ва ба рӯйхати махсус дохил карда шудаанд, маҳдудият муқаррар мекунад.
Он ҳамчунин омода ва такмили ихтисоси мутахассисонро дар ин самт таъмин намуда, барои баргузории намоишгоҳҳои муштарак барои таблиғи мероси моддии фарҳангии ду кишвар замина фароҳам меорад.
“Имрӯз рӯзи таърихӣ аст, зеро Ӯзбекистон аввалин кишваре дар Осиёи Марказӣ шуд, ки бо Иёлоти Муттаҳида созишнома дар бораи мероси фарҳангиро имзо кард. Ба ҷуз Ӯзбекистон, 25 кишвари дигари ҷаҳон бо Амрико чунин созишномаҳо бастаанд. Ҳифзи мероси фарҳангӣ, санъат ва рассомӣ кори осон нест. Аз ин рӯ, ин шартнома имрӯз иқдоми хеле муҳим аст. Ҳукумати ИМА барои ҳифз ва барқарорсозии мероси фарҳангии Ӯзбекистон 1 миллион доллар ҷудо кардааст. Мо аз ҳамкорӣ бо саъю кӯшиши шумо ҷиҳати ҳифзи мероси фарҳангии Ӯзбекистон ва ба ҷаҳониён нишон додани таърихи бойи он манфиатдорем», — гуфт Ҷонатан Ҳеник.
