Зимни мулоқот ҷонибҳо масъалаҳои мубрами ҳамкориҳои Ӯзбекистону Қазоқистонро дар заминаи рушди муносибатҳои байнипарлумонӣ ва додани такони иловагӣ ба муносибатҳои байнидавлатӣ баррасӣ намуданд.
Қосим-Ҷомарт Тоқаев Танзила Норбоеваро хайрамақдам гуфта, барои дастгирӣ ва иштироки фаъолона дар як ташаббуси муҳим - Муколамаи занони Осиёи Марказӣ, ки имрӯз дар Остона баргузор шуд, изҳори сипос намуд.
Сарвари Ҷумҳурии Қазоқистон изҳори итминон кард, ки натиҷаҳои ҷаласаи нахустини ин платформа ба фаъол шудани ҳамкориҳои дохилиминтақавӣ мусоидат намуда, имкон медиҳад, ки роҳҳои ҳалли дарозмуддат дар соҳаи таъмини баробарии гендерӣ ва рушди устувор дар Осиёи Миёна таҳия карда шаванд.
Президент Қ.Тоқаев қайд кард, ки сафари Раиси Сенат намунаи равшани хусусияти хоси ҳамкориҳои дуҷониба буда, ба сатҳи шарикии стратегӣ ва иттифоқи байни Қазоқистон ва Ӯзбекистон комилан мувофиқ аст.
— Мо ба натиҷаҳои сафари давлатии мо ба Ӯзбекистон дар моҳи декабри соли гузашта баҳои баланд медиҳем. 3 марти соли равон дар Чимкент мулоқоти ғайрирасмӣ баргузор гардид, ки дар он масъалаҳои мубрами ҳамкориҳои кишварҳои мо баррасӣ шуданд. Боиси хушнудист, ки кори ҳамоҳангшуда на танҳо дар сатҳи ҳукумат амалӣ мешавад, балки дипломатияи байнипарлумонӣ низ фаъолона инкишоф меёбад. Аз ин рӯ, ман аз соли оянда дар Самарқанд баргузор шудани Форуми дуюми байнипарлумонӣ истиқбол мекунам, — гуфт Қосим-Ҷомарт Тоқаев.
Танзила Норбоева барои пазироии гарму ҷӯшон изҳори сипос карда, таманноҳои неки Президенти Шавкат Мирзиёевро расонд.
— Мо ба ислоҳоти васеъмиқёсе, ки таҳти роҳбарии Шумо дар Қазоқистон гузаронида мешаванд, баҳои баланд медиҳем. Мехоҳам шуморо бо баргузории бомуваффақияти чорабиниҳои бузург, ки ба навсозии сиёсии тамоми низоми Қазоқистон мусоидат карданд, табрик намоям. Қазоқистон дилпурона аз роҳи ислоҳоти прогрессивӣ пеш рафта истодааст ва мардум он самтеро, ки Шумо амалӣ карда истодаед, фаъолона дастгирӣ мекунад, – қайд кард Раиси Сенат.
Дар хотима Сарвари давлат ба роҳбари Ӯзбекистон саломи гарму самимӣ ва орзуҳои нек баён кард.
